KILUSANG MAYO UNO
(May First Labor Center)
TAGAPAMANDILA NG TUNAY NA UNYONISMO
No. 63 Narra St. Bgy. Claro, Proj. 3 Quezon City
Telefax 421-0768, 421-0986
Email: kilusangmayouno@gmail.com, Website:www.kilusangmayouno.org

BALITA
Agosto 28, 2007

Protesta sa Dutch Embassy ikinasa
Paghuli kay Joma Sison, utos ng gobyernong U.S. at Arroyo -- KMU

Agad na kinondena ng Kilusang Mayo Uno (KMU) ang ginawang paghuli kay
Propesor Jose Maria Sison ng Dutch National Criminal Investigation
Department kaninang umaga sa Utrecht, The Netherlands. Bukod sa
paghuli kay Sison, ni-raid din ang opisina ng National Democratic
Front of the Philipines at mga tinutuluyang bahay ng iba pang istap ng
NDFP sa Utrecht at Abicoude.

Madalian namang magpo-protesta sa harap ng Dutch Embassy sa Makati
City bukas, Agosto 29, ang mga progresibong grupo sa pangunguna ng
BAYAN, KMU at International League of Peoples Struggles.

Sinabi ng KMU na di makatarungan ang ginawang paghuli kay Prop. Sison
dahil nito lamang Hulyo 11, 2007, pinawalang sala ng European Court of
First Instance (ECFI) sa Luxembourg ang desisyon ng European Union
Council na blacklisting at terrorist listing kay Prop. Sison.
Pinagtibay ng ECFI na nilabag ng EU Council ang mga karapatan ni Prop.
Sison na ipagtanggol ang sarili niya at wala ni anumang imbestigasyong
criminal o pagdinig ng kaso ang ipinatawag kaugnay sa mga bintang kay
Sison.

"Si Prop. Sison ay lehitimo at kinikilalang political refugee batay na
rin sa Article 1 A ng Refugee Convention," ayon kay Elmer Labog,
Tagapangulo ng KMU.

"Walang mga ebidensya na may kinalaman si Prop. Sison sa pagpaslang
kina Arturo Tabara at Romulo Kintanar. Ginawa lang itong dahilan ng
Dutch government, sa udyok na rin ng GRP at U.S. para patuloy na
gipitin si Sison. Malaki ang posibilidad na may direktang kinalaman
ang U.S. sa paghuli kay Sison. Ang gobyernong U.S. at Arroyo ang may
malaking motibo laban kay Sison na kilalang kritiko ng mga patakaran
ng gobyerno nina Bush at Arroyo," giit pa ng lider manggagawa.

Isinisisi ng KMU sa gobyernong Bush ang paghuli kay Prop. Sison at
sinabi na di dumaan sa proseso ang paghuli kay Sison at nilapastangan
ang mga karapatan nito bilang isang political refugee sa The
Netherlands. Matapos ang September 11 World Trade Center bombings, ang
GRP at gobyernong U.S. ang nagbansag kay Prop. Sison at sa CPP-NPA-NDF
bilang mga terorista. Pero taliwas dito, tagapagtanggol ng kalayaang
sibil at demokrasya si Prop. Sison."

Ayon sa KMU, malaking bigwas ang pagkakahuli kay Sison sa usapang
pangkapayapaan sa pagitan ng GRP at NDFP. "Malinaw na gera laban sa
mamamayan ang gusto ni Arroyo."

Binatikos rin ng grupo ng mga manggagawa ng gobyernong Arroyo na
nakikipagsabwatan sa gobyerno ng Estados Unidos para gipitin si Sison
at iba pang lider ng progresibong kilusan na nakabase sa ibang bansa.

"Napilitan si Prop. Sison na manirahan at mag-apply ng political
asylum sa The Netherlands dahil sa ginawang pagpapakulong at pagtugis
sa kanya ng mga gobyernong Marcos at Aquino noon. Ngayon, si Arroyo
naman ang pursigidong maikulong si Sison."

"Kahit pa makulong si Prop. Sison, hindi titigil ang mga kritiko ng
gobyerno na ilantad ang mga krimen na ginagawa ng gobyerno at militar
laban sa mga aktibista." ###

Reference: PRESTO SUYAT, KMU SPOKESPERSON 0915-6029211, 421-0896


--