| |
KUWINTAS NG SAMPAGUITA PARA KAY KA BEL
Joi Barrios, BAYAN (Bagong Alyansang Makabayan)
Handog namin sa iyo, Ka Bel,
Ay kuwintas ng sampaguita.
Hindi lamang duguang rosas
na nagsasaad ng pagluluksa,
Hindi lamang orkidyas,
Na nagpapahiwatig ng kadakilaan
Kundi sampagita na marahil
Ay iyong isinabit
noong mga taong namasada,
Sampagitang nagpukaw ng pagtula
Ng mga kapwa bayani,
Sampagitang handog ng maralita
Bilang sagisag ng dalisay na pagmamahal sa sinisinta.
Sampagitang ang kabiyak na ilang-ilang
Ay inangkin na ng kapitalistang
Habang buhay mong kinalaban.
Handog namin ay sampaguita
Pagkat tulad mo,
Kaming lahat ay manggagawa
Na ngayo’y nagpupugay.
Mula sa kalye at pabrika,
Mula bukid hanggang tahanan ng iba, sa ibang bayan,
Mula silid-aralan hanggang opisina hanggang ospital,
Pinupuhunan ang lakas,
Para sa kitang di makasapat-sapat.
Isinasanla ang dunong,
Para sa kaunting pantawid gutom.
Lahat kami ay manggagawa,
kaya’t iyong pinaglaban.
Ano nga ba ang isang buhay
Na inalay sa kilusan?
Sa uring pinanindigan?
Sa bayan? Sa bayan?
Masdan ang kuwintas ng sampagita,
Na tinuhog sa madaling-araw,
At inalako ng batang manggagawa sa lansangan.
Bawat bukong ay pangako ng pamumukadkad
Bawat talulot ay halimuyak.
Kuwintas ka ng sampaguita,
Kasamang may mapagkalingang palad sa kasama,
Bayaning ang alaala ay bulaklak sa pakikibaka.
|
|
