| |
PRESS RELEASE
Hulyo 15, 2008
PALAYAIN SI FATIMA AT ROSEANN GUMANOY -GABRIELA TK
“Wala nang iba pang may karapatan sa kustodiya kay Fatima kundi ang
kanyang ina. Ang patuloy na pagkaka-ditine kay Fatima at kay RoseAnn
Gumanoy sa Fort Bonifacio General Hospital ay isang paglabag sa karapatan
ni Nanay Maria Gumanoy at sa karapatan ng kanyang mga anak lalu na kay
Fatima na isang menor de edad”
Ito ang naging pahayag ng Gabriela Timog Katagalugan, kasabay ng panawagan
para agad nang palayain si Fatima at si Rose Ann Gumanoy, mga anak ng
pinaslang na lider magsasaka na si Eddie Gumanoy. Gaganapin ang pagdinig
sa petisyong Writ of Habeas Corpus na isinampa ni Nanay Maria bukas, Hulyo
16, 2008.
Maaalalang dinukot ng mga militar ang magkapatid na Gumanoy noong Hulyo 3,
2008. Makikipagkita sana ang dalawa sa kanilang ina subalit hindi na ito
nakarating sa lugar na napagkasunduan. Dinala ang magkapatid sa Fort
Bonifacio General Hospital.
Ayon kay Helen Asdolo, tagapagsalita ng Gabriela Timog Katagalugan,
nangangamba sila sa maaaring mangyari sa magkapatid habang nasa kamay ito
ng mga militar.
“Hindi na bago para sa pamilya Gumanoy ang mabigwasan ng bangis ng militar.
Mismong ang kanilang ama ay brutal na pinaslang ng Armed Forces of the
Philippines. Ang AFP at ang rehimeng Arroyo ang huling pwedeng
pagkatiwalaan ng pamilyang Gumanoy.”
Maaalalang si Eddie Gumanoy, lider magsasaka mula sa Kasama-TK ay
pinaslang sa kasama ni Eden Marcellana ng Karapatan sa isang fact finding
mission sa Mindoro.
“Ang patuloy na pagmamanman, pandarahas at pagtugis ng militar sa kanilang
pamilya ay pagpapakita na hindi pa rin tumitigil ang rehimeng Arroyo sa
implementasyon ng Oplan Bantay Laya,” pagtatapos ni Asdolo.
For Reference: HELEN ASDOLO (Gabriela-TK Secretary General) 0918-4698497
|
|
